پرۆسەی بەدی ئەنفال وێرای قاتوقڕكردنی گەلی كورد و وێرانكردنی كوردستان و تێكدانی ژێرخانی ئابووری، گەلێك دەردەسەری و نەخۆشی كۆمەڵایەتی لە دوای خۆی بەجێهێشت كە تاوەكو ئێستاش كەسوكاری ئەنفالكراوەكان بەدەستیانەوە دەناڵێنن، ڕاستە ئەم پرۆسەیە گشت چین و توێژەكانی كۆمەڵگەی كوردەواری بەبێ جیاوازی گرتەوە، بەڵام هەروەك لەمەوپێش ئاماژەمان پێكرد ئافرەت بەشی هەرە زۆری ئەو نەهامەتی و دەردەسەریانەی بەركەوت بەتایبەتی دوای ئەوەی كە رەوانەی ئۆردوگا زۆرەملێكان كران ئەویش بۆ مردنی لەسەرەخۆو تێكدانی ڕەوشی كۆمەڵایەتی و شكاندنی كەسایەتیان بەهەموو جۆرێك.
كاتێك مرۆڤ لە مێژووی كوردستان وورد دەبێتەوە، زۆر بە چاكی بۆی دەردەكەوێت كە نەتەوەی كورد بە درێژایی مێژوو دوچاری سیاسەتی قاتو قڕی و چەوساندنەوەو سڕینەوەی ناسنامەی نەتەوایەتی بۆتەوە و بە زەریایەك خوێن ئەم رێگایەی بڕیوە، راگواستنی بە كۆمەڵ و سیاسەتی بە عەرەب كردنی ناوچە كوردنشینەكان و تێكدان و ڕوخاندنی گوندو دێهاتەكان و لە دواقۆناغیشدا كیمیابارانكردنی كوردستان. زنجیرە یەك لەدوا یەكەكانی تاوانی رژێمی عێراق بووە كە دەرهەق بە كورد ئەنجامدراوە ، وەلێ لوتكە و ترۆپكی ئەم زنجیرە تاوانانە و دڕندانە ترین شێوەی قاتوقڕی كوردان ئۆپەراسیۆنی ئەنفالە بەدناوەكانە كە دنیا لیێ بێدەنگ بوو، بەڵێ كارەساتێك كە چەند مانگێك لە (شوبات تا ئەیلولی 1988) لە بەرچاوی وڵاتانی جیهان و كۆمەڵگەی نێودەولەتی و رێكخراوەكانی مافی مرۆڤیش رویدا كەچی هیچ كەس و لایەنێك یان دەزگایەك یاخود ئاژانسێكی دەنگوباسیش باسی لێوە نەكرد.
